مهداه للاستاذ حمد الشمري ابو ركان
ياسـلام الله سـلامٍ على وافـي الشـبور
عد من كبّر وصلّى ومن صـام رمـضـان
لـ بو راكان اللي له في دروب الطيب دور
اللي وقـفـاتـه تـجمّـل لا من الوقت شان
راعي الـفـزعـات وافـي ولا يـمـكـن يبـور
ما احدٍ يجهل مواقف حمد طول الزمان
تشهد اهل الطيب له مايجي حوله قصور
كـاسـبٍ كل الـمراجل وضـامـنـها ضمان
طـيّـب من طيـب ساسـه ووافـي ومخبور
والـعـرب تـدري بـوقـفـتـه والـطـيّب يبان
يـثـبـت بـ وقـفـتـه لا قـامـت الدنيا تدور
في قمم الامجاد له سمعه وصيت ومكان
عالي الاخــلاق دمّـه مـن الطنخه يـفـور
فعله ينومس هل الطيب ويشـوق العيان
من رجـال تكـسر الروس وتـفـج النحور
شمر اللي ماخلق فيهم ضعيف وجبان
من يشوفه يدري انه من وساع الصدور
عند مدحه يتعب الشعر ويعجز اللسان
شـوره ورايه لا قـالـه يشـطّب كل شـور
راعـي الطالات ماهوب يرضى بالطمان
له تحـياتـي عدد ماكِتب فوق السطور
من ضـمـيـرٍ مايبي له عوين وترجمان
كلمات ابوندى