يامن يردّ العلم للغرب وإيران ..
بإن الفتوح وساعة المجد حانه ..
آن الآوان وماحصل خير برهان ..
درسٍ يحوس مخطّطات الخيانه ..
الحزم دكّ معسكر أذناب طهران ..
في ربع ساعه وإنتهى مهرجانه ..
أنتم جهلتوا يالمهابيل سلمان ..
درع العروبه والوطن والدّيانه ..
المعتصم قد مات في ماض الأزمان ..
وسلمان هذا المعتصم في زمانه ..
سلمان ياعدّيت الأمجاد سلمان ..
هيهات يقبل للعروبه إهانه ..
سلمان ياعدّيت الأمجاد سلمان ..
متخالطٍ فيه السّطَرْ والتّكانه ..
سلمان ياعدّيت الأمجاد سلمان ..
غيّر موازين القوى عن مكانه ..
سلمان ياسعْد العرب فيك سلمان ..
ومن يزهمك يبشر بسرع الإعانه ..
سلمان ياسعْد العرب فيك سلمان ..
ماعاد فيه أخبار شجب وإدانه ..
مافيه غير اللي يسرّن الأعيان ..
من سابقات الصوت يشّر بنانه ..
يومنّ هادي صاح تكفى ياسلمان ..
راح اليمن قدّام ناظرْك عانه ..
قال يهبون ولايدوسون الأوطان ..
بدري على عيال المجوس نزلانه ..
اليعربي راسه من العزّ رويان ..
يقدح سطر ويشيل هم الأمانه ..
جرّ الزناد وولّع القاع بركان ..
طيور الهدد من قمّة طويق بانه ..
راحت حباريهم مع القاع شتّان ..
حاديهن اللي لاعدمنا مكانه ..
محمد ولد سلمان تحت أمر سلمان ..
إيران من فعله تزايد جنانه ..
طير السعد من هدّ به نام شبعان ..
وعادات أبو سلمان يكسب رهانه ..
حرٍ على أول هدّته صاد عقبان ..
ياعلّ بطنٍ عقّبه في جنانه ..
وأمن البلد له شان وأركانه أركان ..
من دور نايف ماتزعزع مكانه ..
مسك زمامه طير شلوى بليهان ..
محمد ولد نايف مشى بالأمانه ..
أوقد على الإرهاب شعله ودخّان ..
ترهب هل التّخريب حدّة بيانه ..
والخارجيّه فخرنا طول الأزمان ..
بالفيصلي سيف القسى والرزانه ..
سعود ابن فيصل على الضدّ مالان ..
ليثٍ على الشدّات يلمع سنانه ..
ومقرن وليّ العهد يسلم كحيلان ..
عزّ الحرايب كان الأوضاع شانه ..
تخصيصهم ماهو للّي غير نكران ..
والله يصلح للمليك البطانه ..
ياسيّدي سلمان كان الوعد حان ..
أبشر بشعبٍ مايعرف الجبانه ..
حنا أشرعه ياسيّدي وأنت ربّان ..
عليك تحديد الهدف وزهَلانه ..
ياسيّدي راسي من العز طربان ..
رجّعت للإسلام عزّ ومكانه ..
ياسيّدي مبطي على مرّ الأزمان ..
جيراننا تبشر بقوّ الحصانه ..
في عهد أبو فيصل فزعنا لدسمان ..
بيومٍ على التاريخ صعب نسيانه ..
ويوم المنامه تنتخى وين الأخوان ..
قام أبو متعب وألتوى في عنانه ..
لله درّ المملكه بين الأوطان ..
أنشهد إنّه للعروبه ضمانه ..
ياسيّدي سلمان ياعزّ الأعوان ..
رجّحت كفّتنا على كلّ خانه ..
علّمتهم كيف المعزّه بالإيمان ..
وعلمتهم كيف التهاون جبانه ..
عطيتهم درسٍ مكثّف وعنوان ..
وخذيت تأييد الدّول وإمتنانه ..
شافوك صامل ومتحامل وغضبان ..
يقدح سطر راسك بحزم ومتانه ..
ماكان منهم غير تأييد سلمان ..
حفظاً لدم الوجه دون الإهانه ..
غيّرت ترتيب الدّول وإنت زعلان ..
وغيّرت سهم البوصله عن مكانه ..
بعد الله أنت العزّ ياطير حوران ..
حصن العرب، سوره، وصمّام أمانه ..
الله يعز الدّين ويعزّ سلمان ..
وينصر به الإسلام ويعزّ شانه .
فهد حمدان الهربيد